Taga San Jose Ako

Ini an yaon sa puso.


Dawa saen darahon kan mga bitis, dawa haloy na mag erok sa ibang lugar, saro sana ang pirming nasa daghan: mauli ako sa San Jose.


Ano baga an yaon sa San Jose na dai malingawan? Ano baga ta sobrang kusog kan butong kan banwaan na kinamondagan?


Sabi kan mga gurang, pag an saimong inulnan ilinubong sa pamit'san kan hagyan, saen ka man magduman, dadarahon ta dadarahon ka kan saimong mga bitis sa saimong hinalean.


Siguro ngani, dahil kaiyan kaya dai mawara sa daghan ang pagkamoot sa sadiring lugar.


O kaya dahil baya sa mga gawi-gawi na tinalubuan?


Arog baga kan kamahalan (semana santa), piyesta, aranihan, piyestang kalag, pasko asin bagong taon. Ini an mga espesyal na mga pangyayari na nagtatao nin kolor sa buhay sa San Jose. Ini an mga selebrasyon na nagtao nin mga madahom na mga inagihan na pirming ginigiromdom.


An aro-aldaw na pagbuhay nadadagdagan nin ogma asin mga roromdomon na mga aldaw. Sa mga okasyon na ini, an mga tawo nagkakasararo, an mga magpamilya nagtitiripon, an mga mag aramigo asin mag-aramigang haloy nang dai naghirilingan nagkukurumustahan giraray.


Siguro ngani, ini an balani kan buhay sa San Jose. An pag-iribahan kan mga pamilya, magkabiristo, asin magkahimanwa sa kaogmahan nin pagselebrar.


An gabos nagiging kaiba, mayo nin dai nakakaheras sa mga nangyayari. Gabos libreng makiheras sa kaogmahan, makisaro sa pagselebrar.


Sasaro-saroon ta an mga gawi gawi kan mga tawo sa San Jose sa iba ibang okasyon. Diyan ta mahihiling asin mahahanap an rason kun ano ta dawa saen pa kita makaabot, saen pa kita mag-erok, dai mawawara sa daghan an namamatean na pagkamoot sa banwang dinakulaan. Dai mainenegar, hinihinghing o ikinukurahaw: Taga San Jose Ako.


Kahimanwa, madya, magheras kita kan satong mga naroromdoman manongod sa satuyang banwaan.