Note: Pagkatapos kan misa, hinagad ko an permiso ni Arsobispo na ipublikar sa internet an saiyang homilia.
Homilia
Pagbendisyon kan Simbahan – Parokya ni San Jose
San Jose, Camarines Sur
Diciembre 9, 2007, 4:30 nin hapon
Pagpoon
Marahay na hapon saindo mga tugang. Gayod parehong pagmate nin kapasalamatán an namamatean kan gabos na uya ngonian. Daing dakul na tataramon an kaipuhan tanganing masabotan kun tánô. Mangalágkàlag sana kita sa laog kaining simbahan asin mahihiling niato an dakulang pagbabago.
Mga tugang, kaipuhan asin tama saná na kita magpasalamat huli ta an bagong pakarhayon na simbahan prueba na padagos na nagtatrabaho an mahal na Dios.
Uya ngonian an sarong magayon na harong nin Dios. Salamat sa Kagurangnan, huli ta “Kun bako an Kagurangnan an magpatogdok kan eerokan, daing mahahaman an mga paratogdok.”
An Simbahan kan San Jose
Kasuodma iyo an kafiestahan kan Immaculada Concepcion – an pagpangidam ki Maria na dai nadigtaan nin kasalan. Sosog sa satuyang pagtubod, maninigo sana na siya iyo an madará kan Aki nin Dios; siya na magigin eerokan nin Kagurangnan; siya na magigin Ina nin Dios, dapat na daing digta.
Bako daw na maninigo man sana na magayon, malinig asin mahusay an eerokan nin Dios? Marhay na romdomon niato na ining simbahan – templo nin Kagurangnan, harong nin Ama. Asin siring sa pagkamoot sa sarong ama, boot niato na ipanongod sa Dios an marhay asin magayon na eerokan.
Si Jesus mismo nagpahiling nin pagmakulog sa templo. Magigiromdoman nindo na sarong aldaw naanggot si Jesus ta ginibong bakalan an harong kan saiyang Ama. Siring kaiyan an pagmakulog ni Jesus sa Harong kan Saiyang Ama.
An Mga Simbolo sa Simbahan
Mga tugang, kun kamo magreparo, mahihiling nindo an nagkapirang mga simbolo digdi sa altar: An Krus, an mga Imahen ni Santa Maria asin kan mga Santos.
An Krus iyo an simbolo kan dakulang Sakripisyo ni Jesus duman sa Krus. Sa Krus pinatunayan an dakulang pagkamoot nin Ama sa saiyang banwaan. Idinolot niya an saiyang bogtong na aki. An Krus iyo an altar na kun saen bakong karnero an inatang – kundi an bagong Kordero na si Jesus. Sa lumang tipan pinapabulos an dugo nin hayop sa altar na gapo. Alagad idinolot an pinakadakulang sakripisyo sa altar nin Krus. Duman pinabulos ni Jesus an saiyang dugo para sa kapatawaran nin Kasalan.
An mga santos asin mga martir – mga aarogan/modelo niato. Dai sana nakaka-dagdag nin gayon sa simbahan an mga imahen, kundi an mga ini nagpaparomdom sato kan testigo kan sainda mismong buhay. An simbahan mas magayon nin huli kan istorya kan pagsaksi sa pagtubod kan mga martir asin kan mga santo. An saindang sakripisyo asin pagdusay nin buhay orog na nagpapagayon kan simbahan. Huli ta sinda mga halimbawa kan pagsunod kan sakripisyo ni Jesus na ginibo huli sa pagkamoot.
Uya man an Altar – an lamesa na kun saen aroaldaw idinodolot an bagong sakripisyo. Bako nang tinotong na atang, bako nang madugo na atang, bako nang cordero – kundi an hawak asin dugo ni Jesus. Digdi idinodolot niato sa Ama an sakripisyo ni Jesus na iyo an pagpahiling kan pagkamoot niya sa sato. Sa lamesang ini idinodolot an sakripisyo nin pagkamoot. Kita minatiripon sa palibot kan altar na ini tanganing magpasalamat, maghagad nin tabang, maghagad nin tawad – orog sa gabos tanganing magheras kan hawak asin dugo ni Cristo na iyo an kakanon kan satong kalag.
Mayaman sa simbolo asin kahulugan an simbahan niato.
An Pagbendisyon kan Simbahan
Mga tugang, An liturhiya kan pagbendisyon nagpapagiromdom sa sato nin duwang bagay:
Enot, na magin sincero an satong Pagsamba. An liturhiya puedeng magin sarong palabas sanan kun harayo sa puso an satong pagsamba asin pagpamibi. Maski gurano kagayon an satuyang atang kun dai man niato isinasaboot ini, dai ini nin halaga. Sabi ngani nin Kagurangnan: “Bakong bulawan na atang an hinahagad ko, kundi sarong mapakumbaba asin nagsosolsol na puso.” An kagayonan kan altar na ini magin logod kapahayagan kan satuyang sincerong pagsamba sa Kagurangnan. An sincerong pagsamba nagdadara sato sa pagbabago nin buhay asin sa konkretong gawe nin karahayan. “An mamoot sa Dios nin bilog na puso, pakasabot asin kusog, asin an mamoot sa kapwa siring sa pagkamoot sa sadiri, orog na mahalaga kisa tinotong na atang.”
An ikaduwang leksyon iyo: Kita Templo asin Altar nin Kagurangnan. An Dios dai sana nag-eerok sa materyal na simbahan. Nag-eerok man siya sa satuyang mga kalag. Sarong pagkakataon nag-olay si Jesus asin mga Judio sabi ni Jesus: “Gabaon nindo an templong ini asin papatindogon ko guiraray sa laog nin tolong aldaw.” Sabi kan mga Judio: “cuarentang taon mi ini ipinatogdok, ika tolong aldaw sana.” Alagad an templong sinasabi ni Jesus iyo an saiyang hawak. Kan si Jesus mabuhay liwat, nagiromdoman kan mga disipulos an sinabi niya. Si Maria nagin Tabernaculo kan omboy na si Jesus.
Si San Cesario de Arles igua nin magayon na isinabi manonongod sa dedikasyon nin sarong simbahan. Ini an sabi niya: “Mga tugang kong Cristiano, ngonian iyo an pagkamundag kaining simbahan, sarong okasyon nin pagcelebrar asin pag-ogma. Alagad kita iyo an mga buhay na templo nin Dios… an Dios dai sana nag-eerok sa mga estruktura na gibo nin tawo, sa mga harong na gibo sa gapo. Alagad siya danay na presente, nag-eerok sa satong kalag na linaláng sosog sa ladawan nin Dios… Kaya sabi ni San Pablo, an templo nin Dios banal, asin kamo an templong iyan.
Mga tugang na Cristiano, boot nindong icelebrar kan… dai niato pagraoton an mga buhay na templo nin Dios huli kan mga karigsokan. Sa paglaog niato sa simbahan, iandam man niato an satong sadiri, an satong mga puso siring na boot niato na ining simbahan magayon asin maninigo, dai niato pagdigtaan an simbahan. Hagadon logod niato na ini mapanô nin liwanag. Siring na kamo naglaog digdi sa simbahan, boot man nin Dios na maglaog sa saindong kalag, huli ta siya man nangako: Ako mabubuhay sa sainda, asin ako malakaw sa mga pasillo kan saindang puso.”
Pagtapos
Mga tugang, magayon ining saindong simbahan. Aram ko na dakul na sakripisyo an ibinuhos sa pagpatapos kan pagpakarhay kan simbahan. Daing duda an retablo, an bagong pinta nagpapagayon kaining simbahan. Alagad igua nin orog na nagpapagayon kan simbahan – ini an saindong mga sakripisyo asin karahayan. Nahimo ining pagpakarhay kan simbahan huli kan karahayan nin boot asin mga sakripisyo nin dakul na tawo. An nahihiling ta na kagayonan kaining simbahan, sa likod kaini gabos iyo an pagtubod, pagkamoot asin pagmakolog nindo.
Mga tugang, mga parokyano – salamat sa saindong paghingowa na magka-igua nin maninigong eerokan nin Dios digdi sa San Jose. Dati man na magayon ining saindong simbahan, alagad ngonian, liwat na nagliwanag asin napakarhay.
Salamat saindo mga tugang – mga parokyano, mga donante, mga familia asin benefactors (Office of the President), sa Parish asin Barangay Pastoral Councils, asin an gabos na nagtrabaho para sa simbahan digdi. Dakul an mga nagtarabang tanganing mahimo ining proyektong ini. Bendisyonan logod kamo nin mahal na Dios siring man an saindong mga familia.
Salamat ki Fr. Arkie Caceres sa saiyang paghingowa asin sakripisyo tanganing mapakarhay ining simbahan. Salamat sa padagos na pag-ataman kan parokya asin an simbahan ni San Jose.
Mga tugang, daing duda, an simbahan nin San Jose, saro sa pinakamagayon na simbahan digdi sa Caceres. Salamat sa Dios asin salamat saindo gabos.
Congratulations!
